سۋرەت پرەزيدەنتتىڭ ءباسپاسوز قىزمەتىنەن الىندى
«بيىل «نۇر وتان» پارتياسىنىڭ قۇرىلعانىنا 18 جىل بولادى. بۇل ادام ءومىرىنىڭ ولشەمىندەگى العاشقى كامەلەتتىك جاس بولىپ سانالاتىنىن بىلەسىزدەر. وسى ۋاقىتتىڭ ىشىندە پارتيامىز شىنىعىپ, شىڭدالىپ, ەلىمىزدەگى ەڭ ۇلكەن ساياسي كۇشكە اينالعانى بەلگىلى. قۇرىلعان كۇننەن باستاپ بارلىق ەلدىك ىستەردىڭ باسى-قاسىندا بولىپ كەلە جاتىر», دەدى بۇگىن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىنىڭ اشىلۋىندا سويلەگەن سوزىندە قازاقستان پرەزيدەنتى نۇرسۇلتان نازارباەۆ. سونىمەن قاتار مەملەكەت باسشىسى حالقىمىزدىڭ بەرەكە-بىرلىگىنىڭ ارتۋىنا, ەلىمىزدىڭ ساياي تۇراقتىلىعىنىڭ نىعايىپ, ەكونوميكالىق رەفورمالاردى تابىستى ىسكە اسىرۋعا دا «نۇر وتان» پارتياسى بەلسەندى اتسالىسىپ كەلە جاتقانىن باسا ايتتى.
«حالىقپەن تىكەلەي جۇمىس ىستەپ, كەزەك كۇتتىرمەي شەشىلۋگە ءتيىستى ماسەلەلەردى ۇنەمى نازاردا ۇستاپ, ناعىز ەلدىك پارتيا اتاندى. وعان وتكەن سايلاۋلارداعى ەلدىڭ زور سەنىمى ايقىن دالەل. سول سايلاۋلارعا بەلسەندى قاتىسقان ءبىزدىڭ پارتيا مۇشەلەرىنىڭ ىستەگەن شارۋاسى, جەرگىلىكتى ۇيىمداردىڭ ىستەگەن شارۋاسى ناتيجەسىندە حالىقتىڭ جۇرگىزىپ وتىرعان ساياساتىمىزعا سەنىپ, بىرىڭعاي داۋىس بەرگەنىن كورىپ وتىرمىز. پارتيا بولاشاقتا دا ەلمەن ەتەنە بولىپ, حالىققا قالتقىسىز قىزمەت ەتۋدى جالعاستىرا بەرەدى دەپ سەنەمىن», دەدى نۇرسۇلتان نازارباەۆ.
ەلباسى پارتيا الدىندا ءالى دە كوپ شارۋالار بار ەكەندىگىن اتاپ ءوتتى. «قاجەتتى باعدارلامانىڭ بارلىعى قابىلداندى, ونى وزدەرىڭىز دە بىلەسىزدەر. دەگەنمەن قازىرگى جاعدايدا, دۇنيەدەگى عىلىمي-تەحنيكالىق دامۋدىڭ جاڭا سالاسىنا بۇكىل الەم ءتۇسىپ وتىرعان كەزدە ءبىزدىڭ العا قويعان ماقساتتارىمىز از ەمەس. سوندىقتان وسىنىڭ بارلىعىنا پارتيا باسشى بولىپ, جەرگىلىكتى جەرلەردە ساياساتتى ءتۇسىندىرۋى قاجەت», دەدى پرەزيدەنت.
قازاقستان پرەزيدەنتى بۇگىنگى جاعدايداعى الەمنىڭ دامۋى پارتيا الدىنا دا زور ماقساتتار جۇكتەيتىندىگىن باسا ايتتى. ء«سوز «نۇر وتان» پارتياسىنىڭ ءوزىن جاڭعىرتۋمەن بايلانىستى بولىپ وتىر. ويتكەنى, ەل, ەكونوميكا جاڭعىرىپ, سوعان سايكەس ساياسي كۇشتەر دە سوعان ساي بولۋى ءتيىس», - دەدى نۇرسۇلتان نازارباەۆ.
مەملەكەت باسشىسى ەلدەگى احۋالدىڭ تۇراقتانۋىنا, قازاقستاننىڭ دامۋىنا, حالىقتىڭ الەۋمەتتىك جاعدايىنىڭ جاقسارۋىنا «نۇر وتان» پارتياسى زور ۇلەس قوسقانىن اتاپ ءوتتى. پارلامەنتتىك سايلاۋلاردان لايىقتى دەڭگەيدە ءوتىپ, شىن مانىندە قازاقستاننىڭ باستى ساياسي كۇشى قۇقىعىنا يە بولعانىن ەسكە سالدى. «دەگەنمەن, بىزدە توقتاۋعا بولمايدى. وزدەرىڭىز دە بىلەسىزدەر, بيىل ءبىز ەكونوميكانى, ساياساتتى, ءبىزدىڭ قوعامىمىزدىڭ رۋحاني سالاسىن جاڭعىرتۋعا كىرىستىك. جاڭعىرتۋ ەش ۋاقىتتا دا وڭاي بولمايدى. ول ايتارلىقتاي قارسىلىقتاردى تۋىنداتۋى مۇمكىن. «نۇر وتان» پارتياسىنىڭ ءرولى ەڭ الدىمەن جاڭعىرتۋ باعدارىن ساياسي قولداۋدىڭ تەتىكتەرىن قۇرۋدا», - دەدى پرەزيدەنت.
دينارا بىتىك,
«ەگەمەن قازاقستان».
